„Sameinaðir kraftar í Vatnsmýrinni“

Klara Guðmundsdóttir og Sara Þórðard. Oskarsson

„Með málþinginu í dag þá viljum við ítreka mikilvægi þess að ekki verði hnikað frá þeirri ákvörðun að uppbygging nýs Landspítala verði við Hringbraut. Staðsetningin er mjög mikilvæg fyrir það háskólaumhverfi sem þarna er, tengslin við heilbrigðisvísindasvið Háskóla Íslands og þær greinar sem eru í Háskólanum í Reykjavík og tengjast spítalanum ásamt líftæknifyrirtækjum sem risin eru í Vatnsmýrinni". Þetta segir Anna Stefánsdóttir formaður samtakanna. Hún segir ennfremur:

„Mikilvægt er að heyra skoðanir unga fólksins hér í dag og greinilegur samhljómur með því sem þar kom fram með helstu áherslum okkar hjá samtökunum“.

Þrír fyrirlesarar fluttu erindi á málþinginu: Jón Atli Benediktsson rektor Háskóla Íslands, Klara Guðmundsdóttir læknanemi og Sara Þórðardóttir Oskarsson listamaður.

Jón Atli Benediktsson, rektor Háskóla Íslands, sagði að samstarf Háskóla Íslands og Landspítala væri afar mikilvægt:

„Stofnanirnar störfuðu náið saman og samstarfið hefur leitt af sér mikinn árangur í vísindastarfi á alþjóðlegum vettvangi, ekki hvað síst með sameiginlegum birtingum í vísindatímaritum. Samstarf á sviði kennslu og starfsþjálfunar er einnig mjög mikilvægt og stundum er sagt að Landspítalinn er stærsta kennslustofa Háskóla Íslands."

Fyrirlestur Klöru Guðmundsdóttur læknanema, bar yfirskriftina „Það á enginn eftir að heimsækja þig Sophia“. Klara veitti innsýn í núverandi ástand á Landspítala og lagði áherslu á óhagræði þess að reka bráðaþjónustu á tveimur stöðum í borginni. Sagði hún að aðstaðan væri óboðleg og að núverandi aðstaða á Landspítala væri ógn við öryggi sjúklinga.

Fyrirlestur Söru Þórðardóttur Oskarsson listakonu „Dýnamík í Vatnsmýrinni“ fjallaði um mikilvægi þess að snúa ekki af leið í fyrirhugaðri uppbyggingu Landspítala við Hringbraut. Sara lagði mjög mikla áherslu á nálægð spítalans við háskóla, rannsóknarstofnanir og fyrirtæki til að viðhalda þróun í læknavísindum.

Sara hvatti stjórnvöld að tefja ekki fyrirhugaða uppbyggingu nýs Landspítala á Hringbraut.   Sjá frétt